Жол-коммуналдық органдардың 2022-2023 жылдардағы қысқы кезеңге дайындығын тексеру мақсатында Әкімшілік полиция қызметкерлері техника мен пайдалану учаскелеріне тексеру жүргізді, деп хабарлайды Алтайньюс тілшісі.

Тәртіп сақшылары 1-10 қазан аралығында 25 өндірістік базаны тексерген.

-        Полицейлер қар тазалау техникасының болуы мен жарамдылығына, жанар-жағармай және көктайғаққа қарсы материалдармен қамтамасыз етілуіне, сондай-ақ өндірістік жоспарлардың сақталуына ерекше назар аударды. Қазіргі уақытта мердігер ұйымдардың теңгерімінде 443 бірлік қар тазалау техникасы бар, оның 82% - ы дайындалған және жарамды күйде, - дейді ШҚО ПД баспасөз қызметі.

Күн суытқан жағдайда өндірістік базалардың қоймаларында 7 482 тонна көктайғаққа қарсы материалдар, сондай-ақ 660 тонна тұз және қар басатын учаскелерде 7 512 п.м. қар ұстайтын қалқандар дайын тұр.

-        Облыста республикалық және облыстық маңызы бар автомобиль жолдары бойынша облыстың 8 автожолында 10 жылыту пункті орналасқан. Суық кезеңдерге пункттерді дайындау жұмыстары аяқталды және көмір, ЖЖМ қорларымен, сондай-ақ бірінші кезекте қажетті заттармен қамтамасыз етілгенін атап өткен жөн, - деп түсіндірді жауапты мамандар.

Қала сыртындағы автомобиль жолдарының жай-күйі мен жүрісі туралы тәулік бойы ақпаратты келесі телефондар арқылы білуге болады:

- 77-70-81, 77-60-05-ШҚО ПД Жергілікті полиция қызметі басқармасының кезекші бөлімі;

- 26-28-08, 24-08-98, ұялы. 8-777-535-89-08 - "Қазақавтожол"ЖШС ШҚОФ диспетчері;

- 57-42-52, ұялы. 8-771-086-55-43 - "Облшығысжол" ЖШС диспетчері.

Қар тазалау техникасын дайындау және құм-қиыршық тас қоспасы мен тұздың қосымша көлемін дайындау жұмыстары әлі де жалғасуда.

Жалпыға ортақ пайдаланылатын автомобиль жолдарымен жүруді қамтамасыз етуді бақылау 7 маршрутта және 1-ші стационарлық бақылау бекетінде тәулік бойы патрульдеу түрінде ұйымдастырылған.