Пойыздардағы парақорлық: Айына 3 млн теңге көлемінде көлденең ақша табады
Сыбайлас жемқорлыққа қарсы Ұлттық бюро жүргізген тексеру қорытындысы бойынша, еліміздегі бір пойыз бір айда парақорлықпен 3 млн теңге көлемінде көлденең табыс табады, деп хабалайды Алтайньюс тілшісі.
Жолаушылардың шағымы бойынша сыбайлас жемқорлыққа қарсы іс-қимыл агенттігі 5 ақпанда еліміздің 5 облысында ТЖ-ға арналған кең ауқымды операция жүргізді.
– Агенттік өкілдері пойыздардағы қызмет сапасының төмендеуіне, қауіпсіздік шараларының бұзылуына басты себеп, – жемқорлық деген қорытындыға келді, – деп хабарлады ведомстводан.
Тексеру нәтижесінде азаматтардың көбінесе жолсеріктерге билетсіз міну үшін және қораптар мен пакеттерді салу үшін пара беретіндігі анықталды. Желілік ішкі істер бөлімдерінің қызметкерлері 20-30 мың теңгеден пара алады. Көліктік бақылау инспекторлары (ИТК) - 20-30 мың теңге, тексерушілер 30-40 мың, вокзал бойынша кезекші 8-10 мың теңге көлемінде оңай олжаға кенеледі екен.
– Орта есеппен, 1 пойыз 1 күн ішінде 100 мың теңгеге дейін пара жинайды, айына бұл орташа есеппен 3 млн теңге болады, – деп мәлімдеді Агенттік.
Арнайы операция барысында тек 5 облыста 51 қызметкер ұсталды.
«ТЖ көлігіндегі қылмыстық бизнес өсіп келеді. Бұл қаражат қайда баратыны түсініксіз», - деп қосты агенттік өкілдері.
Олардың айтуынша, аталмыш қылмыстар үшін алдымен темір жол қызметкерлері жазаланады, сондай-ақ пара ұсынған азаматтардың өздері де қатаң жауапкершілікке тартылады. Себебі ол алдымен өзін, содан кейін өзгелерді құқық бұзушылыққа итермелейді.