Президенттік жастар кадрлық резервіне үміткерлерді іріктеу басталады
30.08.2021 | 15.07
0
28
Қыркүйек айында Президенттік жастар кадрлық резервіне үміткерлерді іріктеу басталады. Барлығы 50 адам өтеді. Бұл туралы тікелей эфирде өткен баспасөз конференциясында ҚР Мемлекеттік қызмет істері Агенттігінің ШҚО бойынша департаментінің басшысы, Әдеп жөніндегі Кеңестің Төрағасы Нұрлан Еркебаев және ҚР Президенті жанындағы Мемлекеттік басқару академиясының ШҚО бойынша филиалының директоры Сергей Ковалев мәлімдеді, деп хабарлайды Altaynews тілшісі.
Резервке өткен 50 үміткер тізімі 2021 жылғы 25 желтоқсаннан кейін белгілі болады.
Талаптар күшейтілді
Биыл Президенттік жастар кадрлық резервіне іріктеу қағидалары күшейтілді. Үміткерлер үшін жас және жұмыс өтілі бойынша талаптар арттырылды. Тапсырмалар жаңартылып, қазақ тілін білуі міндеттелді.
Жобаға кімдер қатыса алады?
Конкурсқа "А" корпусының мемлекеттік қызметшілері, министрлер мен комитет төрағалары, 2019 жылғы іріктеудің резервшілері қатыса алмайды. Жобаға Қазақстанның кез келген азаматы қатыса алады.
Басты талап
35 жастан аспаған, жоғары білімді, жалпы жұмыс өтілі 5 жылдан кем емес және мемлекеттік тілді білу деңгейі туралы ортадан төмен емес (B1) нәтижесі бар сертификатының болуы шарт.
Жобаға қалай қатысуға болады?
Үміткерлердің құжаттарын қабылдау 1-30 қыркүйек аралығында pkrezerv.gov.kz интернет-порталында жүргізіледі. Оған қол жеткізу үшін әрбір кандидатқа тіркелу қажет. Бұл жолы электрондық пошта ғана емес, ЭЦҚ да қажет.
- Осы жылдың соңына дейін порталда әрі қарай әрекет ету үшін қол қою қажет болуы мүмкін екенін атап өткім келеді. Сондықтан үміткерлерден оның жұмысқа қабілеттілігін алдын ала алуды және тексеруді сұраймыз, – деді ҚР Президенті жанындағы Мемлекеттік басқару академиясының ШҚО бойынша филиалының директоры Сергей Ковалев.
Қандай жағдайда үміткерлер жобадан шығарылады?
Іріктеуге қатысу үшін жеке кабинетте сауалнаманы толтыру қажет. Ыңғайлы болу және қателіктер мен бұрмалаушылықтарды болдырмау үшін ақпараттың бір бөлігі автоматты түрде толтырылып, тексеріледі. Бірақ кейбір өрістерді өзіңіз толтыруыңыз керек. Сонымен қатар, бірқатар құжаттарды жүктеу керек. Болашақта сауалнамадағы ақпаратты өзгерту немесе толықтыру мүмкін болмайды. Барлық көрсетілген деректер мен салынған құжаттарды мұқият тексеру керек. Дұрыс емес ақпарат анықталған кезде немесе деректер жалған болған жағдайда кандидаттар кез келген кезеңде жобадан шығарылады.
Үміткерлер түрлі кезеңдерден өтеді
Үміткерлердің мәтіндік және сандық ақпаратпен жұмыс істеу қабілеті, ахуалдық міндеттерді шешу қабілеті тексеріледі. Олардың құзыреттерін бағалайды (мемлекеттік басқару академиясының базасында ассесмент-орталықта стратегиялық ойлау, проактивтілік, қызметті басқару, командалық көшбасшылық, мінез-құлық индикаторларының жиынтығы арқылы сендіргіштік бағаланады). Қатысушыларға құндылық бағдарларын анықтайтын ішкі уәждеме мен құзыреттерді анықтауға, сараптамалық комиссияда әңгімелесуге бағытталатын жеке терең сұхбаттан (елдің кәсіби HR-менеджерлерін тарта отырып) өтуге тура келеді.
- Қорытынды кезеңде Президенттік Жастар кадрлық резервіне қабылдау Ұлттық комиссияның отырысында шешілетін болады, – деп толықтырды ҚР Мемлекеттік қызмет істері Агенттігінің ШҚО бойынша департаментінің басшысы, Әдеп жөніндегі Кеңестің Төрағасы Нұрлан Еркебаев.
Тестілеу қашықтан өткізіледі
Бірақ прокторинг жүйесі талаптардың сақталуын автоматты түрде қадағаланады екен. Сонымен қатар, бақылауды кандидаттардың тестілеуді өткізуін бақылайтын арнайы адамдар жүзеге асырады. Ауыстыру фактілерінің алдын алу үшін жүйе сәйкестендіруді жүргізеді.
Комментарии (0)