Өскемен қаласында қазір автожолдарды ағымдағы (шұңқырларды) жөндеуге басымдық берілмек.

Өскемен әкімі Жақсылық Омар жылы күндер басталғанға дейін ағымдағы іс-шаралар жоспарын құру үшін қалалық аумақтарды тексеру бойынша жұмыстарды жүргізіп жатыр, деп хабарлайды Altaynews тілшісі.

Осы жолы әкім өткен жылы асфальт жабыны ауыстырылған жол учаскелерін қарап шығып, жұмыстарға қоғамдық бақылау жүргізген жергілікті тұрғындармен кездесті. Сондай-ақ Красин, Қабанбай батыр (Қазақстаннан Протозановқа дейінгі учаске), Буров, Космическая көшелерін аралады. Шаһар басшысының айтуынша, тұрғындарда жол жабынының сапасына қатысты шағым жоқ.

Сонымен қатар, тексеру жұмыстарының барысында қоғамдық орындарға да мониторинг жүргізіледі екен: Жеңіс мемориалы, Ертіс жағалауы және тағы басқаларына. Мониторингтің нәтижелеріне қарай тас төсеуіштерді, абаттандыру элементтерін жөндеу, мемориалды ағымдағы жөндеу бойынша жоспар құрылады.