25 мамырда облыс орталығы Өскемен қаласына Цифрлық даму, инновациялар және аэроғарыш өнеркәсібі министрі Бағдат Мусин ат басын тіреді. Министр сапар аясында бірқатар мекеменің қызметі жайлы ақпарат алды.
Бағдат Мусин сапар аясында өңірлік IT-hub ашылуына қатысып, жаңа жобалар таныстырылымын тамашалады, деп хабарлайды Altaynews тілшісі.
Министр облыстағы байланыс қызметтеріне қолжетімділік сапасы мен электронды мемлекеттік қызмет көрсету мүмкіндіктерін қамтамасыз ететін және бақылайтын жабдықтардың жұмысын бақылап, тілшілерге құрылғыларды қолдану аясы жөнінде кеңірек түсіндірді. Сонымен қатар, Бағдат Батырбекұлы халықпен кездесіп, түрлі сұрақтарға жауап беріп, электронды үкімет және eGov mobile қосымшасының мүмкіндіктерін көрсетті.
Д.Серікбаев атындағы техникалық университетте өткен кездесуден кейін министр оқу орнындағы Smart инжиниринг орталығы, құрылыс саласына бейімделген орталық, табиғи және техногендік процестерді қашықтан мониторингілеу бойынша өңірлік орталықтағы жаңашылдықты көріп, жұмысына баға берді.
Өскемен қаласындағы көлік қозғалысын реттейтін Ситуациялық орталықты аралаған Бағдат Мусин біраз ұсыныс білдірді. Сонымен қатар, шенеунік қалада енді ашылған «Oskemen IT-hub» IT-hub ашылуына қатысып, жаңа жобаларды тамашалады.

Сапар шеңберінде облыс әкімі мен министр Бағдат Мусиннің қатысуымен облыс елді мекендеріндегі жоғары сапалы кеңжолақты интернет желісіне қолжетімділікті қамтамасыз ету бойынша Жол картасына және «IT-хабты дамыту саласындағы ынтымақтастық туралы», «Спорттық бағдарламалауды дамыту туралы» меморандумдарға қол қойылды.