ШҚО білім басқармасы жастарға этномәдени дәстүрлер мен құндылықтарды түсіндіріп, толерантты тұлға тәрбиелеуге бағытталған шараларды жүйелі түрде қабылдап келеді.
Осындай мақсатта білім беру ұйымдарында 2023-2025 жылдарға арналған этномәдени тәрбие жөніндегі іс-шаралар жоспары бекітілген. Жоспар мектепте шағын Ассамблея институтын құруға және дамытуға бағытталған, деп хабарлайды Altaynews тілшісі.
Жоспар бойынша фольклорлық мерекелер (мәдениет күндері/апталары) өткізу, «Этномәдени диалог», пікірталас клубтары және өзге де зерттеу жобаларын ұйымдастыру көзделген.
Бүгінгі таңда мектептегі шағын Ассамблея Өскемен қаласында, Глубокое, Алтай аудандарында дамыған. Басқа аудандарда  шағын Ассамблея желісін дамыту бойынша жұмыстар жүргізіліп жатыр.
Этномәдени тәрбие бойынша барлық іс-шаралар Достық үйі-Қоғамдық келісім орталықтарымен бірлесе өткізіледі.
26 мамырда мектептегі кіші Ассамблеяны құру және дамыту бойынша семинар-тренинг өтті. Семинар шеңберінде аталған жобаны дамытуға қатысты нақты ұсыныстар мен идеялар айтылды.