Бүгін – халқымыз саяси қуғын-сүргін құрбандарын еске алып, олардың ардақты есімдерін аза тұтатын күн. Қасіретті кезеңді бастан өткеріп, қаншама жазықсыз жапа шеккені, мыңдаған тағдырлар тапталғаны – ащы шындық.

Осылай деген облыс әкімі Даниал Ахметов олардың рухтарына құрмет көрсетуді әр уақытта естен шығармау керектігін атап айтты, деп хабарлайды Altaynews тілшісі.

– Ел Президенті Қасым-Жомарт Кемелұлы Тоқаевтың «Саяси қуғын-сүргін құрбандарын толық ақтау жөніндегі мемлекеттік комиссия туралы» Жарлығы аясында облыста саяси қуғын-сүргін құрбандарын оңалту мәселелері жөніндегі өңірлік комиссия құрылғаны белгілі. Тек 2023 жылдың 1 тоқсанының қорытындысы бойынша ғана жұмыс тобының сарапшылары 107 қорды зерделеп, 2466 істі қарады. Жас ұрпақ халқымыздың басына түскен зұлмат жылдар мен Алаш арыстарының ардақты есімдерін білуі міндетті. Бұл – біздің ортақ тарихымыз. Бұл – тарихтан тағылым алып, биік мақсат – толеранттылық пен бейбіт өмірге бет алған ұлы халықтың ұлағатты ісі, – деді Даниал Ахметов.