ШҚО-да жаңа оқу жылында кімдерге ыстық тамақ тегін болады?
Фото: goo.edu.kz
Жаңа оқу жылының басынан бастап облыстағы барлық бастауыш сынып оқушылары мектептерде тегін тамақтанады.
Бұл туралы облыс әкімі Даниал Ахметов жақында өткен мәслихат сессиясында мәлімдеді, деп хабарлайды Altaynews тілшісі.
– Негізгі міндет – оқу жылының басынан бастап барлық бастауыш сынып балаларының тегін тамақпен қамтамасыз етілуі. Бұған біз миллиард және 400 миллион теңге бөлеміз. Тағы бір маңызды мәселе – көпбалалы және аз қамтылған отбасыларына көмек көрсету. Оған екі миллиард теңге жұмсаймыз, – деп нақтылады облыс әкімі.
Аймақ басшысы сондай-ақ биылғы негізгі міндеттердің бірі – балабақшаларда 100 пайыз орынмен қамтамасыз ету екенін айтты. Қазіргі күні, әкімнің айтуынша, шығысқазақстандықтар үш жастан алты жасқа дейін орындармен толық қамтамасыз етілген. Ал екі жастан бастап балабақшаларда 2500-ге жуық орын жетіспейді. Жақын арада облыста мемлекеттік-жекеменшік серіктестік бағдарламасы аясында мектепке дейінгі жеті мекеме салынбақ.
Даниал Ахметов атап өткендей, екі жыл ішінде балабақшалардағы орын тапшылығы толық жойылады.
Оқи отырыңыз
