Сыртқы істер министрлігінің ресми өкілі Айбек Смадияров Қытаймен арадағы жеңілдетілген визасыз режимді енгізу тәртібін түсіндірді.

Қазақстан Президенті Қасым-Жомарт Тоқаевтың Қытайға жасаған мемлекеттік сапары кезінде тиісті келісімге қол қойылды. Осыдан кейін екі мемлекет өз ішінде қажетті заңнамалық рәсімдерді жасайды, деп хабарлайды Altaynews тілшісі Sputnik Қазақстанға сілтеме жасап.

Оның айтуынша, Қазақстанда осы келісімді бекіту туралы Үкімет қаулысы қабылдануы керек.

Айта кетерлігі, екіжақты келісім бойынша қазақстандықтар Қытайға, ал ҚХР азаматтары Қазақстанға визасыз бара алады. Шекарадан өткен сәттен бастап 30 күннен және 180 күндік кезеңде 90 күннен аспайтын мерзімде визасыз жүруге болады. Ал одан ұзағырақ қалу үшін визаны рәсімдеу керек.

Еске салайық, визасыз режим Қытай азаматтарына Қазақстанда жұмыс істеуге құқық бермейді.