Биыл әлеуметтік медициналық сақтандыру қорының Шығыс Қазақстан облысы бойынша филиалы 59 медициналық ұйыммен жалпы сомасы 81,4 млрд теңгеге шарт жасасты.

Аталған 59 жеткізушінің ішінде 29 медициналық ұйым  – жекеменшік,  қалған 30-ы мемлекеттік және 12-сі  жаңа, деп хабарлайды Altaynews тілшісі.

Тегін медициналық көмектің кепілдендірілген көлемі (ТМККК) шеңберінде  46,4 млн теңгенің, Міндетті әлеуметтік медициналық сақтандыру (МӘМС) жүйесінде 34,9 млн теңгенің қызметтері көрсетілмек.

Биылдан бастап Әлеуметтік медициналық сақтандыру қоры (ӘМСҚ) стоматологиялық клиникалармен тікелей келісімшарт жасай бастады, бұрын бұл емханалар арқылы жасалатын. Стоматологиялық көмек көрсету шартында ештеңе өзгерген жоқ, пациенттер үшін бәрі бұрынғыдай. Тек келісімшарт жасау әдісі өзгерді. Естеріңізге сала кетейік, жоспарлы стоматологиялық көмекті тек балалар мен жүкті әйелдер  ала алады. Шұғыл көмек балалар мен жүкті әйелдерге, зейнеткерлерге, мүгедектігі бар адамдарға және І топтағы мүгедекке күтім жасайтын адамдарға, оның ішінде мүмкіндігі шектеулі балаларға, әлеуметтік маңызы бар және жұқпалы аурулармен ауыратын науқастарға, көпбалалы аналар, атаулы әлеуметтік көмек алушылар және басқаларға тегін көрсетіледі, – деді ӘМСҚ облыстық филиалының директоры Нұрлан Қыдырбаев өңірлік коммуникациялар қызметі алаңында өткен брифингте.

Сондай-ақ ол пациенттердің барлығы стоматологиялық клиникаларға жолдамасыз тікелей жүгіне алатынын, тек жүгінер алдында бұл клиниканың ӘМСҚ жеткізушісі ме, жоқ па нақтылау қажет екенін айтты. Бұл тізімді fms.kz ресми сайтынан көруге болады немесе клиниканың өзіне хабарласып, сұраған жөн.

Былтыр пациенттерді амбулаториялық деңгейде қамтамасыз ету үшін ТМККК және МӘМС шеңберінде 9,7 млрд теңге қаражат бөлінді. Тегін медициналық көмектің кепілдендірілген көлемі шеңберінде – шамамен 55 мың пациентке, міндетті әлеуметтік медициналық сақтандыру пакеті аясында 42 мыңнан астам ересек пациентке және 16 мыңнан астам балаға қызмет көрсетілді.