Елімізде 2023 жылғы 31 наурыздағы жағдай бойынша қызылшаның 107 зертханалық расталған жағдайы тіркелген.

  Өңірлік коммуникациялар қызметінде өткен брифингте Шығыс Қазақстан облыстық санитарлық-эпидемиологиялық бақылау департаменті басшысының орынбасары Сәуле Слямғазина Шығыс Қазақстанда эпидемиологиялық жағдай қанағаттанарлық екенін, халық арасында таралған жағдайлар анықталмағанын мәлімдеді, деп хабарлайды Altaynews тілшісі. 

    Қазақстан Республикасының Ұлттық егу күнтізбесіне сәйкес, елімізде балалар қызылшаға қарсы 1 жасында, содан соң 6 жасында тура сол вакцинамен егіледі. Вакцина алмаған немесе осы инфекциядан өтпеген адамдар иммунитетке ие емес және өмір бойы ауруға бейім келетінін айтады мамандар.

   Спикердің айтуынша, 2023 жылдың екі айында 1 жастағы 1573 бала қызылшаға қарсы вакцина алса, 6 жастағы 1823 бала ревакцинацияланған. Қамту – 19 пайыз.

     Ал облыстық денсаулық сақтау басқармасының ана мен бала денсаулығын сақтау бөлімінің басшысы Мадина Мырзабекова биыл иммундау жоспары бойынша 1 және 6 жастағы 22 мың 500 бала қамтылатынын атап өтті. Ол бойынша профилактикалық жұмыс жалғасуда.

   Брифинг барысында Сәуле Слямғазина 2022 жылы алғашқы медициналық-санитарлық көмек медицина қызметкерлерінің, облыстағы қалалық және аудандық санитарлық-эпидемиологиялық бақылау басқармаларының эпидемиологтарының үйлесімді жұмысының арқасында екпеден бас тарту саны 73 жағдайға азайғанын айтып өтті. Алайда осы екі айда бас тарту саны 8-ге өсіп, 19 ата-ана иммундаудан бас тартқан.