Елімізде бүгін Қазақстан Республикасының кезектен тыс президенттік сайлауы өтіп жатыр.

Қазақстанның министрлері де өз таңдауларын жасауда, деп хабарлайды Altaynews.kz ҚазАқпарат сайтына сілтеме жасап.

Кезектен тыс президент сайлауында өз учаскесіндегі алғашқылардың бірі болып Қорғаныс министрі Руслан Жақсылықов дауыс берді. Өз таңдауын жасағаннан кейін министр ел бойынша Қарулы күштерге қатысы бар 130 мыңға жуық адам дауыс беріп жатқанын атап өтті.

Ал ҚР Премьер-Министрінің орынбасары – Сыртқы істер министрі Мұхтар Тілеуберді мен Әділет министрі Қанат Мусин №66 мектеп-лицейде орналасқан сайлау учаскесінде дауыс берді.

Ақпарат және қоғамдық даму министрі Дархан Қыдырәлі өзі тіркелген сайлау учаскесіне дауыс берушілер көп келіп жатқанын жазды.

Ғылым және жоғары білім министрі Саясат Нұрбек дауыс беруге жұбайымен бірге барғанын жазды.

Оқу-ағарту министрі Асхат Аймағамбетов де отбасымен барып дауыс берді.

Министр елдегі бүкіл педагогтер мен білім саласының қызметкерлерін, студенттерді, барша қазақстандықтарды сайлауда өз таңдауын жасауға шақырды.

Цифрлық даму, инновациялар және аэроғарыш өнеркәсібі министрі Бағдат Мусин дауыс беруге баласын көтеріп барды.

Ал Денсаулық сақтау министрі Ажар Ғиният өзі тіркелген сайлау учаскесіне көтеріңкі көңіл күймен келгенін жазды. Оның пайымынша, президент сайлауында әркімнің дауысы маңызды.

Экология министрі Серікқали Брекешев бүгін өзінің азаматтық таңдауын жасады. Ол Астанадағы нөмірі 117-ші учаскіге барып дауыс берді.