Өскеменде жас теннисшілердің халықаралық ITF Juniors J3 Kazzinc Open турнирі өтті, деп хабарлайды Алтайньюс тілшісі.

Қазақстан теннис федерациясының бас­пасөз қызметі таратқан мәлімет бойынша, турнирдің жекелей және жұп­тық сынында қазақстандық қыздар үздік өнер көрсетті.

Жекелей жарыстың финалында Сандуғаш Кенжебаева мен ресейлік Елизавета Масная бас жүлдені сарапқа салған.

Масная ақтық сынға дейін қазақстандық апалы-сіңлілі Арыстанбековаларды және Аружан Сағындықованы жарыс жолынан тайдырған болатын. Елизавета мен Аружан арасындағы бәсеке 3 сағат 11 минутқа созылғанын айта кетуміз керек. Ал Сандуғаш Кенжебаева жартылай финалда Дана Байдәулетпен 2 сағат 41 минут бойы шеберлік байқасты.

Финалда отандасымыз ресейлік спортшыдан 6:3, 6:4 есебімен басым түсіп, чемпиондық атақты талассыз жеңіп алды.

Жұптық сынның финалында қазақстандық теннисшілер өзара кім мықтыны анықтады. Доданың бірінші ракеткалары саналған Аружан Сағындықова мен Дана Байдәулет Әсем Шойбек-Стефания Шалахова жұбын 6:1, 6:1 есебімен тізе бүктірді.

Бір сөзбен айтқанда, облыс орталығында өткен халықаралық турнирде еліміздің жас теннисшілерінің мерейі үстем болды.