Зайсан аудандық ПБ қызметкерлері қараша айының басында «Астра» атты қызметтік-іздестіру итін пайдалану арқылы жедел-іздестіру іс-шараларын жүргізу барысында Қарабұлақ ауылының 48 жастағы тұрғынын тексерді, деп хабарлайды Алтайньюс тілшісі.
Тексеру барысында қызметтік-іздестіру иті ер адам киіп тұрған күртешенің оң қалтасына белсенді белгі берген. Куәгерлердің қатысуымен тексеру кезінде күдік расталды. Ауыл тұрғынының қалтасынан ерекше иісі бар жасыл түсті өсімдік тектес зат табылды.
- Сараптама қорытындысына сәйкес, тәркіленген зат салмағы 1,093 грамм «кептірілген марихуана» есірткі құралы болып табылады. Қазіргі уақытта ұсталған адамға қатысты бұлтартпау шарасы - келу міндеттемесі таңдалды, - дейді ШҚО ПД баспасөз қызметі.
Аталған факті бойынша ҚР ҚК - нің 296-бабының 2-бөлігі – «Есірткі құралдарын, психотроптық заттарды, сол тектестерді өткізу мақсатынсыз заңсыз дайындау, қайта өңдеу, сатып алу, сақтау, тасымалдау» бойынша сотқа дейінгі тергеу басталды, оның санкциясында 40 тәулікке дейін қамауға алу жазасы көзделген.