Облыс орталығында жақында ғана ашылған Сағадат Нұрмағамбетов атындағы саябақта әскер қатарына алынған жас сарбаздарды салтанатты түрде шығарып салу рәсімі өтті. 

Отан алдындағы борышын өтеу – әрбір азаматтың парызы. Өңірде күзге әскерге шақыру науқаны жүріп жатқаны белгілі. Ата-бабамыздан келе жатқан «Ер ел үшін туады, ел үшін өледі» деген тәмсіл бар. Осы ұранмен шығысққазақстандық 50 сарбаз БҚО Ақтау қаласына аттанды. Олар ҚР Қарулы күштерінің Әскери-теңіз күштері қатарын толықтырмақ.

Салтанатты шараға жас сарбаздардың ата-ана, туған-туыстары, жас сарбаздар, әскерилер мен ШҚО әкімінің орынбасары Нұрбаев Ержан қатысты.

-        Бүгін біз ҚР Қарулы күштерінің 30 жылдығына орай әскер қатарында алынған сарбаздарды салтанатты түрде шығарып салу рәсіміне арнайы жиналып отырмыз. Әскер қатарына алынған күн – әрбір азаматтың есінде мәңгі қалары сөзсіз. Бұл өте күрделі және жауапты қадам. Десе де, мен еліміздің армиясы ата-бабамыздың жолын жалғайтын нағыз патриот азаматтармен толығатынына сенімдімін. Ұлттық қауіпсіздік біздің баға жетпес байлығымыз. Олар бүгінде еліміздің тыныштығын, бейбітшілігі мен тұрақтылығын күзетіп отыр, - деді ШҚО әкімінің орынбасар Ержан Ақтанұлы.

Айта кету керек, биыл облыс бойынша күзгі әскерге шақыру науқанында 1315 азамат отан алдындағы борышын өтеу үшін шақырылған. Сайдың тасындай сапқа тізілген жас сарбаздардың бірі 18 жастағы Сембаев Саят.

-        Менің ойымша, еліміздегі әрбір азамат өзінің азаматтық борышын өтеуге міндетті. Сондықтан өз еркіммен әскерге баруға шешім қабылдадым. Біздің қазір ең басты мақсатымыз – ел тыныштығын күзетуге атсалысып, нағыз азамат ретінде отан алдындағы борышымызды өтеп, елге аман-есен қайтып оралу, -дейді ол.

Жыл басынан бері ҚР Ұлттық ұланы, ҚР Қарулы күштері, шекара қызметі мен Қорғаныс министрлігінде 1070  жас сарбаз отан алдындағы борышын өтеген. Сондай-ақ 36 курсант еліміздің жоғары оқу орындарына, 250 әскерге шақырылушы әскери-техникалық мектепке түсті.