ШҚО-да өткен айда барлық азық-түліктің бағасы қымбаттап кетті, деп хабарлайды Altaynews тілшісі.

Облыстық статистика депармтентінің ақпараты бойынша, сәуірмен салыстырғанда мамырда нан, жеміс, көкөніс, жарманың бағасы өсіпті.

Мысалы, қарабидай, қарабидай-бидай ұнынан жасалған нан 2,1 пайызға, жоғары сортты бидай ұнынан жасалған нан – 1,5 пайызға, жоғары сорттағы бидай ұны – 6,3 пайызға қымбаттаған.

Сәйкесінше, тоқаш және ұннан жасалатын кондитерлік өнімдердің де бағасы өсіп отыр.

Сонымен қатар, мамырда макарон өнімдері, қарақұмық, сұлы, арпа, ұнтақ жарма; сиыр, қой, жылқы және құстың еті, ірімшік, маргарин және тағы басқа да азық-түлік өнімдері біршама қымбаттаған екен.

Керісінше, күріш, тары, шикі сүт, жұмыртқа мен қанттың бағасы біраз арзандапты.

Жеміс-жидектің ішінде лимон мен жүзімнің бағасы айтарлықтай өсті – 15,1 және 12,4 пайызға. Алма, алмұрт, банан, апельсин, пияз, қызылша, сәбіз, картоп, сарымсақ, тәтті бұрыштың бағасы да біршама қымбаттап отыр. Ал орамжапырақ, қиыр мен қызанақтың бағалары, керісінше, төмендеген екен.