Облыс әкімі Даниал Ахметов алдағы жылыту маусымына дайындық мәселесі бойынша қала және аудан әкімдерімен, басқарма басшыларымен кеңес өткізді, деп хабарлайды Алтайньюс тілшісі.

– Бұған дейін Өскемен қаласының әкімі бірқатар шағымдар мен ескертулер алған болатын. Сондай-ақ шұғыл түрде Риддер ЖЭО-мен жұмыс істеуге тура келді, мұндай жағдай қайталанбауы тиіс. Әрбір әкімге көмірді жеткізу, жөнелту мерзімдері мен отын мөлшері ескерілетін барынша нақты кесте жасауды тапсырдым. Сондай-ақ, сату нүктелерінің жұмысын тексеру және осы тізбектен алыпсатарларды (әсіресе шалғай аудандарға қатысты) алып тастау қажет, – деп жазды облыс әкімі әлеуметтік желідегі парақшасына.

Әкімнің айтуынша, 1 тамызға қарай әлеуметтік нысандарда көмірдің жүз пайыздық қоры болуға тиіс, ал 1 қыркүйекке қарай қалалар мен аудандардың жылумен жабдықтау жүйелеріндегі барлық жөндеу жұмыстарын аяқтау қажет.

– Тағы бір маңызды мәселе – жылу беру деңгейі. Атқарылған жұмыстар бойынша есептерді апта сайын тыңдайтын боламын, 15 қыркүйекке қарай өңірдің барлық нысандарында 2022-2023 жылдардағы жылу беру маусымына әзірлік паспорттары болуы тиіс, – деді Даниал Ахметов.