Қазақстан Орталық сайлау комиссиясының төрағасы Нұрлан Әбдіров Семейге жұмыс сапарымен келді, деп хабарлайды Алтайньюс тілшісі.

ОСК басшысы Достық ауылдық округінің Шақаман ауылына барып, жергілікті тұрғындармен кездесіп, өткен ауыл әкімдерінің сайлауын талқылады. Сайлау қорытындысы бойынша, өткен жылдың жазында әкім болып Нұркен Жарлыкенов сайланғанын айта кетейік. Ол сайлаушылардың 92% дауысын жинаған.

– Сайлау нәтижесінде әкім болып тұрғындардың 92% дауысын жинаған Нұркен Жарлыкенов қайта сайланды. Бұл өте жақсы нәтиже. Сайлауға қатысудың маңыздылығын атап өткім келеді, өйткені адамдар өз кандидатына дауыс бере алады және өз таңдауын жасай алады, - деді Нұрлан Әбдіров.

Осыдан кейін ОСК төрағасы Шәкәрім университетінің студенттерімен кездесті. Нұрлан Әбдіров Орталық сайлау комиссиясы жұмысының ерекшеліктері туралы айтып, жастарды белсенділік танытуға және сайлауда дауыс беру құқығын назардан тыс қалдырмауға шақырды.

- Бүгін ешқандай есеп болмайды. Бүгін біз сіздермен ашық әңгіме жүргіземіз. Бүгін бізбен осындай маңызды тақырыпты - сайлау тақырыбын талқылауға келгендерге алғысымды білдіремін. Еліміздің болашағы біздің әрқайсымызға байланысты екенін халық түсінуі өте маңызды, - деп түйіндеді ОСК төрағасы.

Жұмыс сапарының соңында Нұрлан Әбдіров тұрғындармен кездесіп, сапарды қорытындылап, сайлауға қатысудың маңыздылығын тағы да атап өтті.