Шығыс Қазақстан облысының кәсіпорындарында жыл басынан бері 39 жазатайым оқиға болған. Өндірістік жарақаттан зардап шеккен 44 адамның 6-ы қаза тауып, 30-ы мүгедек болып қалды, деп хабарлайды Алтайньюс тілшісі.

ШҚО мемлекеттік еңбек инспекциясы басқармасы қайғылы оқиғалардың басым бөлігі жұмыс берушінің кінәсінен болатынын айтады.  

– Талдау нәтижелері көрсеткендей, жазатайым оқиғалардың негізгі себептері –  өндірісте жұмыстың дұрыс ұйымдастырылмауы және зардап шегушінің өрескел абайсыздығы. Сондай-ақ, ғимараттардың және құрылыстардың техникалық жағдайының төмендігі мен қауіпсіз еңбек тәсілдерін оқытудағы кемшіліктер де қайғылы жағдайға әкеліп соғып отыр, – дейді ведомство басшысының орынбасары Қайрат Әбілқайров.

Зардап шеккендердің басым бөлігі тау-кен металлургия және құрылыс саласында, бюджеттік ұйымдарда жұмыс істегендер.

Айта кетейік Шығыс Қазақстан облысы өндірістік жарақат бойынша Қарағандыдан кейін екінші орында.