Биылдан бастап мерзімді әскери қызмет өтеп жүрген сарбаздар ҰБТ тапсырмай-ақ жоғары оқу орынына түсе алады. Естеріңізге сала кетейік, өткен жылы Қорғаныс министрі мерзімді әскери қызметін атқарғандарға жоғары оқу орындарына түсуге жеңілдіктер беру туралы меморандумға қол қойған болатын.

Аталмыш жеңілдіктер қазір өз міндетін атқарып жатқан және 2022 жылы әскерге шақырылған сарбаздарға беріледі, деп хабарлайды Altaynews тілшісі.

Өскемен гарнизоны 27943 әскери бөлімінің әскери қызметшілері отан алындағы борышын өтегеннен кейін жоғары оқу орындарына түсуді және өздері таңдаған мамандықтар бойынша білім алуды жоспарлап отыр.

Яғни, айына бірнеше рет Жаңа Ахмер кентіндегі орта мектептің мұғалімдері әскери бөлімге келіп, сарбаздарға сабақ өткізіп, сұрақтарына жауап береді.

Айта кету керек, мерзімді әскери қызмет өткерген барлық азаматтарға әңгімелесу нәтижелеріне байланысты Ұлттық бірыңғай тестілеуді есептемегенде әскери борышын өтегеннен кейін екі жыл ішінде ақылы негізде жоғары оқу орындарына түсу мүмкіндік беріледі. Ал мерзімді қызмет кезеңінде үздік нәтиже көрсеткен сарбаздар ҰБТ тапсырмай-ақ ЖОО-ға тегін түсе алады. Сонымен қатар, университеттерден жеке гранттар қарастырылған.