ШҚО-дағы ірі шаруашылықтар көкөніс дақылдарын өсіруге қызығушылық танытпайды.

Облыстағы көкөніске деген қажеттілік жеке қосалқы шаруашылықтар есебінен жабылып отыр екен. Бұл туралы Ауыл шаруашылығы басқармасы басшысының орынбасары Диляра Жылқайдарова айтты, деп хабарлайды Altaynews тілшісі.

Биыл шығыста 10 мыңнан астам гектар алқапқа көкөніс дақылдарын егу жоспарланған.

Ал көкөніс өсірушілерге мемлекеттік бағдарламалар аясында жыл сайын субсидия, несиелер беріледі. Сондай-ақ минералды тыңайтқыштар сеуіп, гербицид сияқты өсімдікті зиянкестерден қорғау дәрілерін пайдаланған көкөніс, өсімдік өсірушілерге оларды сатып алуға кеткен шығынның 50 пайызын қайтарып береді. Тұқым сатып алушыларға  да субсидия қарастырылған. Ауыл тұрғындары, шаруашылық иелері өздерінің жерлерінде, бау-бақшаларында көкөніс өсіру үшін 2,5 пайыздық жеңілдетілген несиені кепілдік қоя отырып ала алады. Мұндай несиені мал өсіру мақсатында да алуға болады.

ШҚО-да осы мақсаттарға биыл 755 миллион теңге бөлініп отыр. Ауыл шаруашылығы басқармасы қазір бұл қаржыға қосымша 1 млрд. 245 млн. теңгеге өтінім беріпті. Қазіргі күні ауыл округтерімен осы жеңілетілген несиелерді игеру бағытында жұмыстар жүргізіліп жатқан көрінеді.