Ағымдағы жылдың 29 мамырында түнгі сағат 2 шамасында патрульдеу барысында Өскемен қалалық ПБ патрульдік полиция батальонының қызметкерлері Ахмер ауылының Аязбаев көшесінде "Kia Rio"маркалы автомашинаны тоқтатты.

Қызметкерлер құжаттарды тексеру кезінде темір тұлпар тізгінінде көлік құралын басқаруға құқығы жоқ 17 жастағы жүргізуші отырғанын анықтады, деп хабарлайды Altaynews тілшісі.

Басқаруға құқығы жоқ жасөспірімге көлік жүргізгені үшін ҚР ӘҚБтК-тің 612-бабы, 2-бөлігі бойынша әкімшілік хаттама толтырылды. Сондай-ақ ҚР ӘҚБтК-нің 612-бабы, 5-бөлігі бойынша кәмелетке толмаған баланың ата-анасы да әкімшілік жауапкершілікке тартылды.

Көлік құралы мамандандырылған айып тұрағына қойылды.