Бүгін А.С.Пушкин атындағы облыстық кітапханада Мемлекеттік қызмет істері агенттігінің ШҚО бойынша департаменті мен ШҚО мәдениет басқармасының ұйымдастыруымен “Дәстүрден тағылым” атты байқау өтті.

Мемлекеттік қызметкерлер күніне орай ұйымдастырылған шараға облыстың түкпір-түкпірінен келген 14 қызметкер қатысып, өзара бақ сынасты, деп хабарлайды Altaynews тілшісі.

Байқау «Қазақ халқының мәдени мұрасы», «Қазақтың ұлттық салт-дәстүрлері», «Дәстүрлі халық мәдениеті – экранда» атты үш кезеңнен тұрды.

Қиын да қызықты жарыста қызметкерлер алдымен өз өнерлерін ортағы салды. Бірі ән айтып, би билесе, тағы бірі өзі шығарған өлеңдерін оқып, күй шертті.

Байқау нәтижесі бойынша 3-орында Өскемен қаласы бойынша мемлекеттік кірістер басқармасының бас маманы Аида Омарова тұрақтаса, 2-орын Катонқарағай ауданы ауыл шаруашылығы бөлімінің бас маманы Тұрсынхан Базарбаевқа бұйырды. Ал ШҚО денешынықтыру және спорт басқармасының бас маманы Назерке Есхатова жүлделі 1-орынға ие болды.