– Жаңа Бюджет кодексін енгізу мемлекеттік қаржыны бақылауды күшейтудің, олардың тиімділігін арттырудың және бюджет қаражатын ұтымды, әрі үнемді пайдалану қағидаттарын белгілеудің негізгі құралы бола алады. Онда: бюджетті қалыптастыру үшін негіз болатын стратегиялық басымдықтар мен нысаналы көрсеткіштерді әзірлеу үшін тетіктерді енгізу; бюджет қаражатын тиімсіз пайдаланғаны үшін жауапкершілік тетіктерін айқындау; қаржылық тұрақтылықты қамтамасыз етуді және борышқа қызмет көрсету шығындарын барынша азайтуды ескере отырып, мемлекеттік борышты басқару жүйесін әзірлеу; сыбайлас жемқорлықты азайтуға және жауапкершілікті арттыруға ықпал ету мақсатында бюджетті қалыптастыру және бақылау процестеріне жұртшылықтың қатысуы үшін тетіктерді енгізу көзделетін болады. Осы қағидаттарға бағытталған жаңа Бюджет кодексі Бюджет ресурстарын ұтымды және үнемді пайдалануға ықпал ете отырып, мемлекеттік қаржыны басқарудың неғұрлым тиімді және тұрақты жүйесін құруға көмектеседі, – дейді ол.

– Ауқымды инвестициялар экономиканың әртүрлі салалары мен секторларына айтарлықтай әсер етіп, жаңа жұмыс орындарын құруға, өндірістік қуаттылықты арттыруға және инфрақұрылымды жақсартуға ықпал етуі мүмкін. Ол үшін  іскерлік ахуалды жақсарту, бюрократиялық кедергілерді азайту және бизнесті тіркеу процестерін жеңілдету секілді инвесторлар үшін тартымды орта жасау қажет. Жолдар, порттар, әуежайлар және энергетикалық нысандар салу сияқты инфрақұрылымдық жобаларға бағыттылаған инвестициялар – сөзсіз экономикалық өсуді ынталандыруы мүмкін. Бұл ретте, шетелдік инвесторларды белсенді тарту экономикаға айтарлықтай үлес қоса алады. Ол мақсатқа  шетелдік кәсіпорындарға жеңілдіктер, кепілдіктер беру және оларды ынталандыру арқылы қол жеткізуге болады. Сонымен қатар еліміздің жас инновациялық компанияларына инвестиция салу мен мемлекеттік қолдау көрсету – жаңа технологиялар мен Индустриялардың пайда болуына ықпал етуі мүмкін, – деді Ж.Қоңырбаева.