Екі күн бұрын Өскеменді қасат қар басып қалды. Тұрғындар жолдардың нашар күрелгенін айтып, қар тазалаушы техникалар көзге де көрінбейді деп шағымданған еді. Бүгін жауапты мекеме басшысы жағдайдың анық-қанығын айтты, деп хабарлайды Алтайньюс тілшісі.

«Таза Өскемен» директоры Тимур Екібасовтың айтуынша, қара тазалайтын техникалардың көпшілігі жол қозғалысына кедергі келтірмес үшін түнде шығады.

– Жұмыстың негізгі бөлігі түнде атқарылады. Сондықтан тазаөскемендіктер еңбегі бір сәт тасады қалғандай. Мәселен бір-екі күнде 12 мың шаршы метр қар шығарылды. Әлі де қарқынды жұмыс істеп жатырмыз. Алдағы аптаның алғашқы жұмыс күніне дейін қала іші мұнтаздай болады, – деді ол.

Әдеттегідей сенбіде қала тіршілігін барлауға шыққан әкім Жақсылық Омар «Таза Өскемен» басшысына барлық күшті жұмылдырып, бұдан да ұқыпты жұмыс істеуге тапсырма берді.

– Техника жеткілікті. Тиісті қаражат бөлінген. Кәсіпорынның құзырында бес бірдей мердігер компания бар. Тек ұйымдастыру жұмысы сәл сәтсіздікке ұшырап жатқан сыңайлы. Қарқынды күшейту керек, – деп пікір білдірді қала әкімі.