ШҚО-да құтқарушылар балаларға арналған мультфильм шығарды
Қысқа метражды фильмде суға түсу ережелері егжей-тегжейлі көрсетілген, деп хабарлайды Алтайньюс тілшісі.
«Тентек және Ая» атты мультфильмді төтенше қызмет өкілдері «MediaPRO.KZ» ЖШС-мен бірлесіп жарыққа шығарды.
– Жаз айларында жазатайым оқиғалардың жиілеп кететіні жасырын емес. Әсіресе, шомылу маусымында балалар көп зардап шегіп жатады. Мультипликациялық фильмді жасаушылар балаларға суға ересектерсіз бару қаншалықты қауіпті екенін және кез-келген жағдайда қауіпсіздік шараларын сақтау керектігін түсіндіреді. Біз балалардың оқу процесінде стандартты емес әдіс-тәсілдерді жақсы көретінін білеміз. Сондықтан да осындай қызықты қадамға бардық, – деп мәлімдеді ШҚО ТЖД баспасөз қызметінің өкілдері.
Сюжет мазмұны мынандай: басты кейіпкерлер ережелерді бұзып, келеңсіз жағдайларға тап болады. Содан кейін құтқарушылар қарапайым әрі түсінікті нұсқаулар береді.
Мультфильмді ТЖД-ның Instagram және YouTube парақшасынан көруге болады.
Айта кетуіміз керек, биылғы шомылу маусымында балалардың суға батып қаза болуы 2021 жылдың осындай кезеңімен салыстырғанда 2,5 есеге төмендеді.