Өскемендегі балабақшалардың тамаққа төленетін ақысы қымбаттауы мүмкін екен. Оның себебі азық-түлік бағасының көтерілуіне байланысты.

Бұл туралы Өскемен Қоғамдық кеңесінің әлеуметтік желідегі парақшасында хабарланып отыр. Онда азық-түлік бағасының балабақша ақысын көтеруге негіз бола алатыны туралы жазылған.

Қазір балабақшаға төленетін ақы - 11500 теңге. Алдағы уақытта ол 13500 теңгеге дейін көтерілуі мүмкін.

-Біз балалардың тамақтану рационын жақсартуды жоспарлап отырмыз. Мысалы, тауық етінен гөрі сиыр етін жиірек пайдаланбақпыз. Қазір әр баланың тамағына күніне 550 теңгеден айналады, балабақша ақысы қымбаттаған соң, күніне 650 теңге болады. Бұл пайдалы азық-түлікті көбірек сатып алуға мүмкіндік береді, - деп жазады хабарламада қалалық білім беру бөлімінің міндетін атқарушы Данияр Ахметовке сілтеме жасап.