Ақсуат ауылында өткен жарысқа әлемнің 23 елінен палуандар қатысты: Ресей, Моңғолия, Қытай, Германия, Дания, Қырғызстан, Чехия, Грузия және т.б.

Балуандар екі салмақтық дәрежеде күш сынасты: 80 келіге дейін және 80 келіден жоғары «түйе балуандар».

Финалда 80 келіге дейінгі салмақта шығысқазақстандық спортшылар Марат Қуаныш пен Ғабит Дәулетбаев күресіп, жеңіс тұғырына Марат Қуаныш көтерілді. Ғабит Дәулетбаев екінші орынды иеленсе, үшінші орынды өзбек палуаны Расул Камалитдинов қанжығасына байлады. Абсолюттік салмақ дәржесінде тағы бір өзбек палуаны Мухсин Хисамутдинов жеңіп, екінші орынды ресейлік Рустам Арсланов, үшінші орынды грузиялық Бека Берданишвили иеленді.

Айта кетсек,өткен жылы қазақ күресі Азия ойындарының бағдарламасына енгізілгеннен кейін әлемнің көптеген елдері бұл спорт түріне аса қызығушылық танытуда. Сондықтан осы жолғы жарысқа қатысуға ниет білдіргендердің де қарасы көп болды.

Ырғызбай Досқанұлының атындағы осы турнир алтыншы рет өткізіліп отыр. Ал қатысушылардың саны жылдан жылға артуда.

Турнир тек ұлттық күрес түрінен ғана емес, ат спорты түрлерінен де өткізілді: көкпар, бәйге және аламан бәйге. Жеңімпаздар мен жүлдегерлер жарыстың басты демеушісі - «Қазцинк» ЖШС-нен қомақты қаржылай сыйақылармен марапатталды. Турнирдің басты сыйлығы – 1 500 000 теңге, күміс марапат – 1 000 000 теңге, қола марапат – 500 000 теңге.