Облыстық статистика департаментінің мәліметтері бойынша азық-түлік тауарларының арасында облыста биылғы жылдың наурызында ақпанмен салыстырғанда сиыр еті – 3,3%, жылқы еті – 4,4%, шошқа еті – 3,9%, қой еті – 2,8%, сиырдың бауыры – 2,4%, күріш – 1,6%, ұнтақ жармасы – 0,4%, сұлы – 2,6%, арпа – 1,7%, тары – 3,1%,  жұмыртқа – 0,8%-дан, айран – 2,7%, мәйекті ірімшік – 1,5%, маргарин – 1,3%,  алкогольді ішімдіктер – 1,8%, темекі өнімдері – 2,2%-ға қымбаттағаны тіркелген.

Қарап отырсақ қымбаттамаған нәрсе қалмапты.

-Жаңа жылдан бері еттің келісі 200 теңгеге көтеріліп кетті. Қазір ел қой, сиыр,жылқы етінен көрі тауық етін көп алатын болып барады, көпшілігі тауыққа көшіп кетті. Сауда, баяғыдағыдай емес,- дейді Риддер қаласының шағын базарында ет саудасымен айналысып жүрген кәсіпкер Хабриға Шаипова.

Ет, айран, сүт қымбаттағанымен қарақұмық жармасы – 3,6%, құс еті – 0,6%, тұздалған майшабақ – 1,2%, тұз – 1,7%, кетчуп – 1,8% -ға арзандаған.

Жеміс-көкөніс өнімдерінен алма бағасы – 6,2%, жүзім – 2,0%, банан – 8,3%,  қияр – 1,9%, қызанақ, қызылша – 2,3% өскені байқалды. Апельсин 3,2%, кептірілген бұршақ – 1,4%-ға арзандапты.

Азық-түлік емес тауарлардан наурызда киім, аяқкиім – 0,5%, планшеттер – 2,8%, автомобильдер – 0,8%-дан, отын – 2,5%-ға қымбаттаған көрінеді.

Тұрғын үй-коммуналдық шаруашылық саласында Өскемен қаласы халқының қоқысты шығаруға ақы төлемі 10,4%-ға өскен. Денсаулық сақтау жүйесінде дәрігерге алғашқы қаралу 8,7%, медициналық зертханалардың, уқалау-сылау – 2,5%, физиотерапевтік ем – 1,9%-ға қымбаттады. Көлік қызметі арасында алыс қашықтыққа қатынайтын пойыз билеті – 1,2%, авиабилеттер – 0,2%-ға қымбаттаған.

Тұрмыстық қызмет көрсетуде фотосалондар қызметі – 3,5%, қоғамдық тамақтандыру  – 1,6%, шаштараздар мен сұлулық салондары – 4,1%, аяқкиім жөндеу – 6,1% және тұрмыстық техниканы жөндеу шеберханалары қызметі– 2,6%-ға қымбаттады.

Наурызда елімізде АИ-92 маркілі жанар май литрінің бағасы    163,4 теңге болып,  жыл көлемінде жанармайдың бұл түрі 14, 9 пайызға өскен.  АИ-95/96 - 178,2 тенге болып 15 пайызға өскен. Жаздық дизелді отын құны 162,1 тенге болып,  23 пайызға қымбаттаған.