Өскеменде 10 жасар бала жол-көлік оқиғасынан зардап шегіп, ауруханаға түсті. Қазір балалардың жарақат бөлімінде ем қабылдап жатыр.

–Кеше кешкі сағат 18.00 шамасында  Lexus RX 300 автокөлігінің жүргізушісі  Көкжал Барақ көшесіндегі  7/1 үйдің қасындағы жолдан өте бергенде  реттелмейтін жаяу жүргіншілер өткелінде жүргіншіге жол бермеген.Соның салдарынан 10 жастағы жеткіншек  зардап шекті.Жүргізушіге қатысты  әкімшілік құқықбұзушылық туралы ҚР ҚК 610 б. бойынша хаттама толтырылды,-деді бұл оқиға туралы қалалық ІІБ баспасөз қызметінің маманы Самал Ғадылбекова.

Кеше бұл оқиғаға  қатысты фотосуреттер де әлеуметтік желіні шарлап кетті. Тұрғындар өз балаларының қауіпсіздігне орай үлкен алаңдаушылық танытуда.

– Бұл оқиға тура жолаушылар өтетін жерде болды. Көліктің қатты келгені соншалық, баланың аяқ киімін де ұшырып жіберді. Түні бойы сол баланың жағдайын ойлап алаңдап шықтық,-деп жазды  оқиғаны көрген куәгерлердәң бірі әлеуметтік желіде.

Қазір бала  дәрігерлердің бақылауында. Бас ми шайқалысы анықталған. Бүгін таңға дейін жағдайы жақсарды.

– 10 жасар Богдан бізге кешке кешке түсті. Жағдайы ауыр болды. Таңға дейін ем-шара жүргіздік. Қазір жағдайы тұрақталды,-деді Ана мен бала орталығының емдеуші дәрігері Рафаэль Халитов.

–Баламның жағдайы жақсы,құдайға шүкір,алаңдаушылық танытқандарға үлкен рахмет айтамын,деді  зардап шегушінің анасы Наталья.