Аягөзде Омархан қари жүлдесі он бірінші рет өткізілді
Жуырда № 4 орта мектеп пен Мамырсу ауылдық округіндегі балалар – жасөспірімдер спорт мектебінің спорт залдарында мектеп қызметкерлері арасында халыққа еңбегі сіңген емші, ұстаз Омархан қари Қажыұлы Қазыбай қари жүлдесіне арналған волейболдан жарыс өткізілді. Биыл он бірінші рет ұйымдастырылып отырған жарысты № 4 орта мектеп үнемі жоғарғы дәрежеде өткізіп келе жатыр екен.
Сайыс басталар алдында оқушылар ән айтып, әсем би билеп, жиналғандарға шаттық сыйлады. Бұл күні жарысқа 11 команда қатысты. Қала мектептерінен № 1, № 4, К. Бозтаев атындағы орта мектептері, балалар – жасөспірімдер спорт мектебі, политехникалық колледж командалары қатысса, ауылдық округтерден Айғыз, О. Меңаяқұлы, М. Әбеулов, Ж. Жабаев, Т. Көбдіков, С. Ғаббасов атындағы орта мектептердің командалары жарыс жолына шықты.
Сонымен, ақтық ойындарға №1, № 4, балалар мен жасөспірімдер спорт мектебі командалары жолдама алып, жүлделі орындарды сарапқа салды. Қорытындысында №1 орта мектеп командасы І орынды, балалар- жасөспірімдер спорт мектебінің командасы ІІ орынды, ІІІ орынды № 4 орта мектебінің командасы иеленді.
Жарыс соңында жеңімпаздар мен жүлдегерлер және үздік ойыншылар Қазыбай қаридың ұлдарының арнайы әкелген кубоктарымен, аудандық білім бөлімінің мақтау қағаздарымен марапатталды.