Шығыс Қазақстан облысында Алматы-Өскемен тас жолының бойында болған жол апатынан 5 адам қаза тауып, 4 жолаушы жансақтау бөліміне жеткізілді. Зардап шеккендердің біреуі 11 жастағы бала, деп хабарлайды Аltaynews.kz тілшісі.
Облыстық ТЖД-нің берген мәліметтері бойынша, бақытсыз оқиға Жарма ауданындағы Балықтыкөл ауылының маңында болған.
«Тойота-Камри» автокөлігінің 1975 жылы туған жүргізушісі К.А. қарсы жолаққа шығып кетіп, «Тойота-Карина» көлігімен бетпе-бет соғылған. Жол апатының салдарынан 2 көліктің де жүргізушілері, «Тойота-Карина» салонындағы 2 жолаушы оқиға орнында көз жұмды, осы көліктің тағы бір 1971 жылы туған жолаушысы алған жарақаттарынан аудандық орталық ауруханада қайтыс болды.
«Тойота-Камри» көлігінің 4 жолаушысы Жарма ауданындағы № 1 медициналық бірлестігінің жансақтау бөліміне жеткізілді. Олардың біреуі 11 жастағы бала.