Биыл Семейде жедел медициналық жәрдем ауруханасының құрылысы басталады. Аталған жобаға 1,2 млрд. теңге бөлініп отыр, деп хабарлайды Аltaynews.kz тілшісі.
Бұл жөнінде облыс әкімі Бердібек Сапарбаев Семей қаласында өткен есептік кездесу барысында айтты.
Семей қаласында 2013 жылы бұдан басқа бірнеше емдеу мекемесі қолданысқа беріледі. Мысалы, Семей шаһарындағы көпсалалы қалалық аурухананың, радиологиялық орталықтың және туберкулезге қарсы балалар диспансерінің құрылыстарын үстіміздегі жылы аяқтап, пайдалануға беру жоспарланған. Сонымен қатар ағымдағы жылы облыс аумағында салынуға тиіс 29 ауылдық дәрігерлік амбулаторияның тоғызы салынатын болады.